مريت رجال ٍ كريم السلوم
اعطيه واخذ منه بعض العلوم
طرقت بيبانه ورحب ميات
رحب تراحيب الرجال الثقات
وأثنى يقول الله يحيي نباك
قلت البقا وتعيش علمي عفاك
ماجيتك إلا قدر والله وكيل
تسليم وأخذ معك فنجال هيل
قال إقلط المجلس وظيف محسوب
وإن ماوسعك إنجلسك فالقلوب
واقرب لي الدله وعذق التمر
واردف تراحيب ٍ تفك الحجر
وساعة تصافينا بمافالصدور
قال إستمع مني لبعض الأمور
ماغرك إنا بالف نعمه وخير
نعمه ونعيم وكل شي ٍ يسير
حدالقلوب بربها مومنه
ونسير وانابوك في مامنه
فهذي اكبر نعمة يا؟؟؟؟
والحمدلله فاعل اللي يريد
لكن لامنك بغيت الصحيح
ماعاد فينا واحد ٍ مستريح
كل ٍ وله هم ٍ ولوماتراه
الله يعين على ظروف الحياه
والله يوحد كلمة المسلمين
ويخارج المديون من كل دين
نابوك رجلتنا كلتها البنوك
من حيث ماسمعوبك إتناتفوك
مافيه بنك إلا يقدم عروض
حتى نشبنا في سداد القروض
لوراتب الرجال منا دبل
تلقاه يرجي له مثيل الخبل
مانحتسب ليلة نزول المعاش
ونهاجم الصراف مثل الفراش
ونحذف الراتب يمين وشمال
ولا تقل يصبح ومعنا ريال
والمشكله مطلبات الحريم
أعوذ بالله من بليس الرجيم
كل ٍ معه ثنتين ولا ثلاث
ماعندهن للواقع اي إكتراث
حريم في لسراف مثل البروق
دخنا وحن ندرج بهن كل سوق
هذا وهن يقلن نبغا نسوق
عزالله ان يهضم لناس ٍ حقوق
واللي طلب من حرمته لقتصاد
قالت نوى يعرس خبيث المراد
وإبشر بغث النفس والملعنه
دف ٍ وتسحيبٍ وطول السنه
هذا لنا يااهل القرنش البسيط
ياللي تقعدنا على كم شريط
وإماآل بوقرشين حمر الزغود
فسمع قراقرهم مثيل الهنود
راحت دراهمهم باالاسهم ضياع
اسمع عواهم مثل عوي السباع
فيهم طريح وفيهم اللي فغر
راحوا ضحاياكل سهم ٍ حمر
وأهل الثقه والنيه الصافيه
إن سلت عنهم فيدك العافيه
طاحوا هل النيات وكلوا هوا
راحوا ضحايافي بطايق سوا
ضلوا على الهامور مثل الحمام
ياخذ دراهمهم بليا نظام
قال إبشروا بالمكسب المعتبر
بكره وكل ٍ يبتني له قصر
باعوا عمايرهم برخص الثمن
وتسابقوا له من جميع المدن
واليوم واقعهم مثل ماتشوف
في باب ديوان المظالم صفوف
يشكون والشكوى لرب العباد
يالله تنصرنا على اهل الفساد
واهل البضايع زادوا اسعارها
يسوم شاريها لهب نارها
يالله تغيث بلادنا بالمطر
آبارنا جفت ويبس الشجر
وأسبابها نابوك جور البشر
ماكن كل ٍ له حساب وقبر
لكن ترى بيرق رجانا يريز
بالله ثم اولاد عبدالعزيز
إن شاءالله ان الخيرمناقريب
بوجود ابومتعب عماة الحريب
حده يسيرها بحكم الشريعه...
إن شاءالله إنه مايصاخيبنا
__________________
[center]