اسئلة تنعش الذاكره

كانوا يدلعوني : بالصنق لأن امي كانت متوحمه على جارتها السوريه اول الأشهر وفي الحلقه الأخيره سكنت بجنبها وحده سودانيه (وعشان كذا طلعت حلو وكسول)!
كانت عيرتي: ابو ضربان! لأني كنت دايم في الشوراع العب برجون واتقلب في التربان عشان اعجب (غزوه ام ريحه لأنها كانت تحبني والدليل انها كانت تخليني اسوي حمار وتركب على ظهري وامشيها على سطوح بيتها حزة العصريه الى المغرب واذا جاء دوري تنحاش وتخليني اصيح واجي بكره ونفس السالفه وتلعب علي كثير (وانا فرحااان لأنها كانت تقول لي تراني احبك ياحصاني الأصيل وانا مخفه!!)
بخصوص اللقافه: فكنت مؤدب لأني مااحب الأختلاط بعيال الحاره لأنهم كانو دشير!! بس كنت دايم احب اتلقف على اختي الكبيره (ام عصعص) واهبل فيها !!
اول صديق: واحد كان اسمه الشوحطي وهو الآن عسكري ومعه 11 ورع !!
اول مضاربه: مع واحد اسمه مطلق وانا في ثاني أ عشان كنت انا شاطر في الفصل وهو كان مروح وغبي وماعطيته المرسمه لأنه اكل مرسمته ويبغى حقتي وانا معصي اعطيه !! ويوم رحت الفسحه ويسرقها من الشنطه وانا اشوفه واجيك طاير واعكرفله ويجي واحد يساعدني لأنه مايحب هذا الوسخ !!
بالنسبه لطلعة الشارع: كنت احب الشارع كثير ولكن حدي عند الباب مااتعدى اليييييين وصلت سن المراهقه وبعدها مابقيت حاره ولاشارع!!
اول مدرس: كان اسمه الجربوع وحتى درس ابويه في الليلي!!
ايام الطفوله: كانت حلوه واتذكر منها (الزير حق المويه) اللي كان تحت الدرج لأنه الوسيله الوحيده لدينا للتبريد في ذلك الوقت قبل حوالي 30 سنه!!
اول سياره: الله يخلي رجولنا ماعرفنا السياره الا بعد العشر سنوات الأولى من حياتي!!
السرقه من البقاله: اما هذي فعد واغلط واذكر مره(شلحت طوقعتين حقت البنات عشان اعطي اخواتي الغلال ام عصعص واختي الثانيه اللي كنا نسميها (ورجلوا) لأنها كانت راعيت مشاكل (تنط على الردمه وتتزحلق بالماصوره حقت الشارع وتدور اقرب مضاربه ودووووس ياخنفووووووس!! وكنت اعطيهم الطواقع عشان يتثبتون في العيد! ومازالت يدي خفيفه الى الآن يعني علك حلاوه وانت ماشي!!
فوازير رمضان: ماكان عندنا تلفزون اول عشر سنين من عمري عشان كذا كنت مخاوي الشارع!!!
افلام كرتون : راجع الأجابه السابقه !!

1- وش كانوا يدلعونك اول ؟
ج1 من زين اسمي علشان يدلعوني

2- وش كانت عيرتك وانت صغير؟
ج2 كبير الراس

3- هل كنت ملقوف وانت صغير ؟
ج3 كنت مثل الحيه تقبص براسها وذيلها

4- من اول صديق عرفته وهل لازال متواصل معك غير جماعتك ؟
ج4 ياكثرهم كنت ادرس مع سوريين ومصاريه وكلهم متواصلين معي جوالي كل شوي يرن

5- اول مضاربه وهل انجلدت فيها ؟
ج5 والله اني ما اذكر اني فزت في مضاربه


6- هل كنت تطلع الشارع بنعال وإلا حافي ؟
ج6 كنت اطلع حافي وما البس نعالي الزنوبه الا اذا رحت المدرسه

7- هل تذكر اول مدرس درسك وهل تتوقع ميت وإلا حي ؟
ج7 اذكره استاذ مصري كل صبح ريحت فمه بصل وثوم واتوقع انه قد مات لانه شايب يو كان يدرسني

8- وش الشي اللي باقي محتفظ فيه من ايام الطفوله ؟
ج9 محتفظ بصوره لي وانا صغير والله لوتشوفها ان تقول هذا من جنوب افريقيا

9- اول سياره عرفتها مع ابوك ؟
ج9 ماكان فيه سياره اذكر حماره قد كنا نركب عليها وتودينا المحل الي نبي الله يسقي ولكان فيه حوادث ولا اي مشاكل

10- هل كنت تسرق من البقاله ؟
ج10 الله كم قد تسرقت وخاصه التونه

11- هل كنت تتابع فوازير رمضان ؟
ج11 لا ماكان عندنا تلفزيون كنا نسمع وام احديجان في ليالي رمضان نسمعها بالراديو

12- اذكر الافلام الكرتونيه اللي كنت تحبها ؟
ج12كنت اتابع الثيران يوم كان ابويه يحرث عليها المزارع واتابع التيس الفحل يوم كان يلقح الغنم كل صباح هذا افلااامي
مشكوووور يا الندااااوي على هذه الاسئله